實測寶馬 E46 M3 by Marco

我一向都好鍾情於寶馬既M3，尤其係E46。好多人都鍾意佢經典得嚟又望唔厭既車身。我自己覺得佢同同期既C32 AMG 比佢個樣新淨好多，價值亦冇C32跌得咁犀利。

今日我終於試咗部M3，渣起上嚟第一個感覺就係佢比普通320i既胎盤輕，渣慣320既我可能一開頭會有小小唔慣，不過佢既鈦感好直接。好多人都話個波箱唔係幾好，不過我又覺得其實又唔係真係咁差，轉波既速度同320既自動波唔差太遠。有d人可能會覺得chok，但我覺得如果轉波個陣太順滑反而冇乜feel，如果你想坐得smooth啲既話你只要轉波前輕輕鬆一鬆油門就唔會覺得chok。雖然佢同現時既DCT/DSG比係會慢咗啲，但以一架15年車嚟講已經相當好。

呢架車最吸引之處就係佢副自然吸氣直6引擎。馬力輸出高達338匹。同320i既直6比佢啲聲較嚓，較尖，有啲金屬咁既聲，非常獨特，雖然我覺得320個副直6啲聲亦都唔差得去邊。呢種直6既聲係而家冇乜邊架寶馬有既。如果講3系，只有340i同M3係仲用緊直6 Turbo，其他都轉哂本人覺得好難聽又普遍既直4 Turbo引擎。E46 M3呢副引擎同E46 普通3系比除咗尖啲之外，紅區亦都高好多，轉數錶大概可以去到8000轉，而去到大概3，4000轉Vanos就會kick-in，你會好明顯聽到架車變聲，簡直係比耳朵既享受。而我亦都渣過一架換咗 M3 CSL 既風箱既普通M3，佢吸氣既聲仲正，你會覺得自己坐上咗一架賽車度，佢個種聲好特別好吸引，係一啲現代既Golf GTi，Civic Type R冇可能比得上既聲。